ardeepineda

            Naitanong na rin sa wakas sa isang senator ang matagal nang tanong na bumabagabag sa aking isipan, “bakit gumagastos ang mga politiko ng daang milyong piso sa kampanya, para lang sa posisyong P30,000 isang bwan lang naman ang sweldo?”

            Tinanong si Sen. Miriam Defensor-Santiago ng ABS-CBN ng nasabing katanungan. At kanyang iminungkahi na, “dahil mababawi mo, may tubo ka pa!” Oo, dahil maliban sa P120 milyong pork barrel ng isang senador sakanyang anim na taon na termino, meron pa siyang nakukuhang “miscellaneous millions” buwan-buwan. At hindi pa diyan kasama ang sweldo ng isang senador na P30,000. At kapangyarihan.

            Congressmen at Senators lang ang may pork barrel. Subalit hindi pwedeng walang ‘lagay’ ang mga lokal na opisyal na nasasakupan ng mga nasabing senador at kongresista. Sa mga pondo pa lang ng mga estraktura, at mga kung ano-ano pang proyekto sa mga probinsya/siyudad, umaabot ng milyon ang ‘kick-back’ ng mga governors, mayors, na nahahati pa ito sa iba pang local public officials.

            Kung saka-sakali mang nabalitaan mo na may balak gawing siyudad ang inyong probinsya, humanda ka na. Dahil kapag ito’y natupad, mas malaki ang maipapataw na buwis sa mga taong nakatira dito. At sa pagtaas ng singil ng buwis, gayon din ang pagtaas ng “kita” ng mga tiwaling public officials.

            Wag kang magtataka kung may mga proyekto ng gobyernong hindi matapos-tapos sa mga lugar niyo. Dahil estratehiya ito ng tiwaling opisyal sa inyong lugar para taasan pa sa susunod na taon ang kanyang budget.

            Sa tipikal na sitwasyon, ang isang tao ay binibigyan ng budget para sa isang taon. Dito niya kinukuha ang gastusin para sa lahat. Gusto man nating maging ‘efficient’ at magtipid, hindi pwede. Bakit kamo? Dahil kapag hindi mo naubos ang budget mo ngayong taon, sa susunod na taon, mas mababa na ang makukuha mo. Dahil kaya mo naman palang mabuhay sa mas maliit na budget. You do the math/logic.

            Isipin mo, kung sinasabi ng ating mga politiko na “tumatakbo ako para makatulong sa bayan”, bakit kailangang magpatayan ng magkalabang panig para lang sa nasabing posisyon? Bakit hindi na lang sila magtulungan, total, parehong pagtulong naman sa bayan ang kanilang pakay?

            Bakit ganito ang politika sa Pilipinas? Kalian kaya magbabago ang ating mga politiko. At ang mga bagitong politiko, lagi na lang nagiging “TRAPO” (Traditional Politician). Kung sinasabing “role model” ang mga taong ito, bakit sila ang gumagawa ng katiwalian?

            Naniniwala naman ako na may mga taong “matitino” na nakaupo sa pwesto. Subalit panigurado’y mangilan-ilan lang ang mga ito. Marami at talamak pa rin ang mga taong umaabuso sa bansa na nakaupo sa pwesto.